Shaphang ka Distrik

Ka Distrik East Jaintia Hills ka dei kawei na ki 11 (khadwei) tylli ki distrik ha ka jylla Meghalaya. Da ka jingphiah noh ia ka Distrik Jaintia Hills ba mynshuwa sha ka East bad ka West Jaintia Hills, la pynkha ia ka Distrik East Jaintia Hills ha ka 31 tarik u Naitung, 2012 bad ka nongbah jong ka distrik ka long ha Khliehriat. Ka Distrik East Jaintia Hills ka long ka iing ka sem ia ki jaidbynriew ba kham kongsan ka jylla Meghalaya, ia ki ba la tip kum ki ‘Jaintia’ ne ki ‘Pnar’, bad kiwei pat ki jaidbynriew rit kum ki ‘War’ bad ki ‘Biate’.

Ka kyllum lang ia baroh ki shnong ki ba hap hapoh ki ar tylli ki Community & Rural Development Block (C&RD), kata ka Khliehriat C&RD Block bad ka Saipung C&RD Block, bad ki don ia ki pud ki sam kumne harum:-

U Lat ka jylla Meghalaya u la kyntiew ia ka Khliehriat Civil Sub-Division sha ka distrik bad u la ai kyrteng iaka Ka Distrik East Jaintia Hills bad ka nongbah jong ka ka ba long ka Khliehriat.

Histori

La pynlong ia ka Districk East Jantia Hills da ka jingkyntiew noh ia Sub-Dibishon Khliehriat ba mynshuwa sha ka distrik. Shuwa ia ka jingpynlong ia ka Sub-Dibishon Khliehriat, la ju don mynshuwa ia ka Administrative Unit ia kaba la pynlong ha ka 14 tarik u Nailar, 1976, da ka jingthmu ban wanrah ia ka jingpyniaid shnong ka sorkar ba kham jan sha ki paidbah. Hadien san snem shiteng, ia kane ka unit la pynkyntiew sha ka Sub-Dibishon ba pura ha ka 27 tarik u Jymmang, 1982, bad la buh ia u Sub-Divisional Officer kum u khlieh jong ka, bad hadien kata la pynkyntiew pat ia ka sha ka Distrik ha ka 31 tarik u Naitung, 2012 haba ka sorkar ka jylla Meghalaya ka la shim ia ka sienjam ban pynkha shuh sa saw tylli ki distrik.

Ka Rukom long ka Jaka, ka Mariang

Ka Distrik East Jaintia Hills ka don shaphang mihngi duh jong ka jylla Meghalaya. Ka jingheh ka jaka ka long kumba 2,040 sq. km. Ka ieng ha kumba 1200 m. sha jrong na sla duriaw bad ka don hapdeng 25°.17~30: 25°.22~40 Latitude bad 92°.15~20:92°.23~30 Longitude. Shaphang shathie ka don ka ri Bangladesh, ka Distrik North Cachar Hills jong ka jylla Assam ka don na shaphang mihngi, bad ka Distrik West Jaintia Hills na shaphang shatei bad na shaphang sepngi. Ka don kumba 97 km ka jingjngai na Shillong, kaba long ka nongbah jong ka jylla, bad la pyniasoh ia ka da ka surok bah NH 44 shaduh Assam.

Kumba long kiwei pat ki bynta jong ka jylla, Ka Distrik East Jaintia Hills ka don ruh ka suiñ bneng kaba pyngngad. Ki jaka jong ka Distrik ki ju kham ioh bha ruh ia ka lyer ba juh tip kum ka Tropical Monsoon. Ka aiom slap ka ju wan naduh pdeng bnai Jymmang haduh u bnai Nailur, bad ka kham khriat ha u bnai Risaw bad Naiwieng. Ka aiom tlang ka long kaba kham khriat kumba long ha nongbah Shillong. Ban khein kyllum lang, ka jinglong ka suin bneng ha ka distrik ka long ka bym da shit than ne khriat than.

Ka Spah Mariang

Ka ri lum Jaintia ka long kaba riewspah ha ka jingdon ia ki mar poh khyndew kum u dewiong bad u mawshun. Ka jingdon baroh jong kine ki mar pohkhyndew ka kot shaduh kumba 37.25 million tonne u dewiong bad 1054 million tonne u mawshun. Nalor kine, ka don ruh ia ka spah mariang kum ki mar ba pynmih na ki khlaw ki btap. Ha ka liang ka rep ka riang, ki nongrep ki kham rep bha ia u kba. Nalor u kba, ki ju rep ruh kum ia u kwai, u pathi lane tympew, u phan, u phan karo, u riewhadem, u shynrai, u sying, u sohmrit, bad kumta ter ter. Bun na ki nongrep ki hap ban shaniah tang ha u slap namar ba ka jingpyniaid um sha ki jaka rep ne lyngkha ka long tang ha ki ba khyndiat ki jaka.

Khyndiat Shaphang ka jingpyniaid Elekshon ha ka Distrik

Ka Distrik East Jaintia Hills ka don ia ar tylli ki Asembli Konstitwensi, kata ka 5-Sutnga-Saipung (ST) bad ka 6-Khliehriat (ST), bad baroh ar ki hap hapoh ka 1-Shillong (ST) Parliamentari Konstitwensi.